НЕИСПОЛНУВАЊЕ НА ДОГОВОРИТЕ Договорите се склучуваат со цел да бидат исполнети. Исполнети се договорите кога правата и обврските што произлегуваат од нив ќе бидат целосно извршени. Со исполнувањето на правата и обврските, всушност престануваат и самите договори. Но, доколку договорите содржат некој недостаток во волјите на договорните страни или се спротивни со законските и другите прописи, се сметаат за неважечки. Во зависност од степенот на неважноста, Договорите можат да бидат: ништовни и рушливи Ништовни се договорите кои се спротивни на принудните прописи и на моралните норми. Тие може да бидат: противзаконити, неморални, лихварски, симулирани, фиктивни, договори спротивни на дејноста на правните лица и договори склучени со потполно деловно неспособни лица. -Противзаконити се договорите што се спротивни на принудните прописи содржани во Уставот, законите или подзаконските акти. -Неморални се договорите кои содржат престација што е спротивна на моралните норми на една општествена средина. -Лихварски е договорот со кој едно лицекористејќи ја тешката материјална состојба на друго лице, недоволното искуство, лекомисленоста или зависноста на друго лице, ќе договори за себе или за некој друг корист која е во очигледен несразмер со она што тој на другиот му го дал или сторил или се обврзал да му даде. Фиктивни се оние договори со кои се создава привидност дека се склучени, а всушност не се. -Симулирани сеоние договори во кои договорните страни прикажуваат во јавноста дека склучиле друг договор, а не оној што всушност го склучиле. Договорите склучени со потполно деловно неспособни лица се сметаат за ништовни. -Договорите склучени спротивно на регистрираната дејност на правните лица се ништовни. Ништовните договори по правило не произведуваат правно дејство. Рушливи се оние договори кои во себе содржат некој недостаток поради кои можат да бидат поништени. До нивното поништување се сметаат за полноважни. Причини кои доведуваат до рушливост на договорите се: ограничената деловна способност, недостатоците на волјата на страните (на пример: закана, заблуда или измама) и прекумерното оштетување. Целта на договорите е да бидат исполнети. Но, тие можат да престанат на повеќе начини: престанок на договорите со заедничка спогодба, престанок на договорите со еднострано раскинување, престанок на договорите поради неможност за извршување, престанок на договорите поради смрт или престанок на едната страна.